ԻՄ ԾՆՆԴՅԱՆ ՕՐՎԱ ԿԱՊԱԿՑՈՒԹՅԱՄԲ

Խաչիդ շնորհը պսակիր
օրերից քամած մաքուր լույսով:
Կյանքը,— ասում եմ ես,—
հիվանդ եզան պես
մի օր կարող է քեզ դավաճանել:
Նվիրական անուրջներդ
կարող են սպանվել խեցուց դուրս
մարդկանց անփույթ նետերից.
ցույց տուր հղկված արցունքդ միայն
և թռչող զատիկը մայիսիդ:

Բ

Քեզ պիտի խաբեն դեռ գույները՝
խենթացնող գինու մոլեխնդությամբ,
հայացքները՝ ժպիտների մեջ թաքնված.
ու պիտի առաջնորդի մահադարձ լույսը քանի անգամ
կյանք որոնելու:
Պատերազմները պիտի ծեծեն կուրծքդ
և հաղթանակների լույսի տակ պիտի նկարվես:
Տարերքի և պղտոր կրքերի մեջ ապրող վտառների
դողդոջուն աղերսանքը
և հուսակորույս լռությունը կորսա քեզ:

Գ

Եվ ու՞մ պիտի ապավինես…
Եվ ինչքա՞ն պիտի կորովի
բազուկներիդ և թռիչքներիդ երկաթը,
որ մերվես մեղվի մեջ՝ օրերի փեթակում: