Թուրքիայի որոշ քայլերը` 2015 թվականին ընդառաջ

Թուրքիայի զբոսաշրջության և մշակույթի նախարար Օմեր Չելիքը մի շարք ուշագրավ հայտարարություններ է արել, որոնք վերաբերվում են Հայոց ցեղասպանության 100-րդ տարելիցին ընդառաջ թուրքական կողմի ժխտողական քայլերին:

Թուրք նախարարը նշել է պաշտոնական Անկարայի ծրագրերից մի քանիսը, որոնք նպատակ են հետապնդում կանխարգելել Հայոց ցեղասպանության միջազգային ճանաչումը և հակահայ քարոզչություն իրականացնել: Թուրքական կողմը մշակել է 6 կետանոց նախագիծ, որով էլ պայքարելու է Հայոց ցեղասպանության ճանաչման դեմ: Նախարարը ներկայացրել է նրանցից մի քանիսը:

Այսպես, թուրքական իշխանությունները պատրաստվում են «Առաջին աշխարհամարտի տարիներին հայերի կողմից սպանված թուրքերին» նվիրված հուշահամալիրներ կառուցել Անկարայում և Ստամբուլում: Արդեն որոշվել են նաև հուշարձանների տեղադրման վայրերը: Ստամբուլում թուրքական զեղծարարության հերթական մարմնավորումը տեղադրվելու է Շիշլի թաղամասի Մաչկայի ժողովրդավարության զբոսայգում: Անկարայում էլ նման հուշարձան կտեղադրվի Կարմիր մահիկի հրապարակին մոտ գտնվող Հաղթանակի զբոսայգու հրապարակի դիմաց:

Թուրքերը պատրաստվում են նաև խոշոր հուշահամալիր կառուցել Իզմիրում (Զմյուռնիա), որը նվիրված կլինի ԱՍԱԼԱ-ի կողմից սպանված թուրք դիվանագետներին: Հուշահամալիրը կառուցվելու է Իզմիրի Բայրաքլը շրջանում: Առաջիկայում թուրքական իշխանությունները մրցույթ կհայտարարեն լավագույն նախագծի համար, իսկ հաղթողին որոշելուց հետո կսկսվի շինարարությունը:

Թուրքիայի զբոսաշրջության և մշակույթի նախարարությունը կսկսի նաև արտասահմանցի զբոսաշրջիկների հետ աշխատող զբոսավարների «վերապատրաստումը»: Վերապատրաստման համար կօգտագործվեն պատմության մեծ զեղծարար, ընդգծված հայատյաց գործիչ, Թուրքիայի պատմագիտական ընկերության նախկին ղեկավար Յուսուֆ Հալաչօղլուի գրքերը: Նրա գրքերը կթարգմանվեն նաև անգլերեն և կտպագրվեն մեծ քանակով:

Թուրքերը նաև նախատեսում են աշխարհի մի շարք երկրներից Թուրքիա հրավիրել տասնյակ ուսանողների և գիտնականների` Հայոց ցեղասպանության մասին «ճշմարտությունը» պատմելու համար:

Թարգմանությունը` Գևորգ Պետրոսյանի

Հայտնում է allturkey.am-ը Բոլորը