Ստամբուլում տարեց հայուհու սպանության համար մեղադրվող Նազարյանը կրկին նշել է, որ չի հիշում նման դեպք

Այս տարվա սկզբին Ստամբուլի Սամաթիա թաղամասում Մարիցա Քյուչյուքի սպանության և 3 այլ հայ կանանց վրա հարձակումների համար մեղադրվող Մուրադ Նազարյանը դատավարության ընթացքում առաջին անգամ նախօրեին կայացած նիստի ժամանակ պատասխանել է դատավորի հարցերին։

Դատարանում Նազարյանը նշել է, որ չի հիշում և սպանությունն ինքը չի կատարել։ «Չեմ կարողանում հիշել։ Այդ սպանությունը ես չեմ կատարել» հայտարարել է Նազարյանը։

Ավելի վաղ ոստիկանատանը տված ցուցմունքներում նա հայտարարել էր, թե «չի հիշում է և հնարավոր է՝ ինքն է կատարել սպանությունը»։ Դատարանում նրա խոսքերի և ցուցմունքի միջև եղած տարբերության վերաբերյալ Նազարյանը հայտարարել է, թե ոստիկանատանը ցուցմունք տալու ժամանակ հոգեբանական ճնշման է ենթարկվել, դրա համար էլ ասել է, թե «միգուցե սպանությունն ինքն է իրականացրել»։

Սպասվում է, որ Նազարյանի գործով մյուս դատական նիստը կգումարվի նոյեմբեր ամսին։

Նազարյանին մեղադրում են հունվար ամսին Ստամբուլի Սամաթյա թաղամասում տարեց հայուհիների վրա հարձակման և նրանցից 85-ամյա Մարիցա Քյուչյուքի դաժան սպանության համար։

Նշենք, որ Նազարյանին ճանաչողների նշում են, թե նա ֆիզիկապես ոչ ուժեղ և որոշակի հոգեկան խնդիրներ ունեցող մարդ է, ով ունակ չէր դիմացինին վնաս հասցնել։ Թուրք առաջադեմ շրջանակները նույնպես կասկածելի են համարում Նազարյանի հետապնդումները։

Միևնույն ժամանակ Նազարյանն ինքը չի ընդունում իր մեղքը՝ նշելով, որ դեպքերի վերաբերյալ ոչինչ չի հիշում և այդ մասին իմացել է ոստիկաններից։


Հայտնում է allturkey.am-ը


Բոլորը