Կարմիր Խաչի ներկայացուցիչները հանդիպել են գերի ընկած զինվորին. Հակոբը լավ է

Օգոստոս 11, 2013 | 15:26
Ղարաբաղա-ադրբեջանական սահմանն օգոստոսի 7-ի լույս 8-ի գիշերը, ժամը 3.00-ի սահմաններում սխալմամբ հատած, 22-ամյա Հակոբ Գեւորգի Ինջիղուլյանին հանդիպել են Ադրբեջանի Կարմիր Խաչի աշխատակիցները եւ հայտնել, որ Հակոբը լավ է: Այս մասին NEWS.am-ի թղթակցի հետ զրույցում ասաց Հակոբի հորեղբոր տղան` Նորիկ Ինջիղուլյանը: «Հիմա այլ նորություն չկա, երեւի նորություն կլինի երկուշաբթի, երեքշաբթի»,- ասաց նա:

Ի դեպ, Հակոբի հարազատները նաեւ նշեցին, որ Հակոբը տեսողության հետ կապված խնդիրներ է ունեցել, հետեւաբար նրան դիրքեր չպետք է տանեին: «Հա, տեսողության հետ խնդիրներ է ունեցել, բայց, եթե տարել են 1.5 տարի ծառայել է, էլ ինչ կարող եմ ասել»,- ասաց Նորիկ Ինջիղուլյանը՝ հավելելով, որ Հակոբը մինչեւ գերի ընկնելը երեքշաբթի ծնողների հետ է խոսել, նրան ծանրոց էին ուղարկել: Նա ասել է, որ ամեն ինչ լավ է ու ծանրոցն էլ տեղ է հասել: Իսկ օգոստոսի 8-ին եկել եւ այդ լուրն են հայտնել:

Ավելի վաղ տեղեկացրել էին, որ ղարաբաղա-ադրբեջանական սահմանը օգոստոսի 7-ի լույս 8-ի գիշերը, ժամը 3.00-ի սահմաններում սխալմամբ հատած, 22-ամյա Հակոբ Գեւորգի Ինջիղուլյանը Ոսկեվազ գյուղի բնակիչ է եւ մինչեւ ծառայության մեկնելը սովորել է Ճեմարանում: Այս մասին NEWS.am-ի թղթակցի հետ զրույցում ասել էր Ոսկեվազի գյուղապետ Հայկ Հովհաննիսյանը: Վերջինիս խոսքով, ընտանիքը զբաղվում է հողագործությամբ, սոցիալապես անապահով են, իսկ Հակոբը ընտանիքի մեծ որդին է: Նա ծառայում էր Ասկերանի շրջանի զորամասերից մեկում: Իսկ մոլորվել եւ սահմանը պատահաբար հատել է, երբ գնացել էր ջուր բերելու: Գյուղապետը նշել էր, թե ինքն ու գյուղացիները երկար ժամանակ չէին համարձակվում Հակոբի ծնողներին պատմել կատարվածի մասին: Ավելի ուշ տղայի տուն էին գնացել ռազմական ոստիկանության աշխատակիցները եւ հայտնել: Ինչից հետո հայրը գնացել է նախարարություն: Դիմել են նաեւ «Կարմիր Խաչին»: «Ծնողների վիճակը շատ վատ է: Հատկապես մոր վիճակը: Ամբողջ գյուղը հավաքվում, գնում-գալիս են: Մինչեւ տեսնենք ինչ է լինում»,- ներկայացրել էր գյուղապետը: Հիշեցենք, որ ԼՂ ՊՆ դեպքից հետո հայտնել էր, որ օգոստոսի 7-ի լույս 8-ի գիշերը, ժամը 3:00-ի սահմաններում, ծառայությունն իրականացնելու ժամանակ, ըստ նախնական տեղեկությունների՝ տեղանքում չկողմնորոշվելու հետեւանքով 1991թ. ծնված շարքային զինծառայող Հակոբ Գեւորգի Ինջիղուլյանը հատելով ղարաբաղա-ադրբեջանական սահմանը, հայտնվել է հակառակորդի պահպանության տակ գտնվող տարածքում: ԼՂՀ ՊՆ մամուլի ծառայությունից հայտնում են, թե դեպքի մանրամասները պարզելու համար տարվում է քննություն:

Հայտնում է news.am-ը


Բոլորը