Հայերը չեն թողնի, որ ես հանգիստ աշխատեմ. Աուրելիա Գրիգորիու

Ինչպես հաղորդում է hraparak.am կայքը՝ մոլդովացի իրավապաշտպան Աուրելիա Գրիգորիուն, ով Հայաստանի խորհրդարանում հանդես էր եկել հակահայ հայտարարություններով, դեռևս տառապում է հետապնդման բարդույթով: Մասնավորապես, նա ադրբեջանական կայքերից մեկին տված հարցազրույցում ասել է. «Հայերը չեն թողնի, որ ես հանգիստ աշխատեմ: Հավանաբար, ստիպված կլինեմ հեռանալ երկրից: Ավելին, վերջին շրջանում ինձ խորհուրդ են տալիս նախապատրաստվել հանդիպման ԱՍԱԼԱ-ի գրոհայինների հետ: Այնպես որ, վիճակը շատ լուրջ է»:

Հիշեցնենք, որ այս տարվա հուլիսի 4-ին ԱԺ-ում ընթացող «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» թեմայով համաեվրոպական խորհրդաժողովի վերջին օրը սկանդալ տեղի ունեցավ. Մոլդովայի խորհրդարանական փաստաբան Աուրելիա Գրիգորիուն «Մարդու իրավունքների պահպանումը և պաշտպանությունը «սառեցված հակամարտությունների» տարածքում» թեմայով զեկույցի ժամանակ ոչ միայն անդրադարձավ հայ-ադրբեջանական հակամարտությանը, այլև Հայաստանին անվանեց ագրեսոր երկիր։

Նա հայտարարեց, որ «Հայաստանը գրավել է Ադրբեջանի տարածքների 20 տոկոսը՝ ադրբեջանցիների նկատմամբ իրականացնելով ցեղասպանություն»։ Նա նաև ասաց, թե «Խոջալուի ցեղասպանությունն իրականացրել են հայերն, ինչն այլևս միջազգայնորեն ճանաչված փաստ է»։

Ադրբեջանական կայքերին տված իր հերթական հարցազրույցում տիկինը դարձյալ խոսել է իր դեմ կիրառվող ճնշումների, իրեն պաշտոնից ազատելու և պատասխանատվության ենթարկելու նախաձեռնությունների մասին:

Աուրելիա Գրիգորիուն նաև պատմել է, թե իր հասցեին հնչած սպառնալիքների ու վիրավորական արտահայտությունների համար դիմել է իրավապահներին, սակայն վերջիններս ոչինչ չեն ձեռնարկել, իսկ փորձագետներն ու Մոլդովայի գիտությունների ակադեմիայի լեզվաբանները վիրավորական ոչինչ չեն տեսել այն բանում, որ մարդիկ Աուրելիային անվանել են «ծախու քած»:

Հայտնում է tert.am-ը Բոլորը