2013թ.-ի առաջին կիսամյակում Հայաստանը լքել է 95 հազար մարդ

2013թ.-ի առաջին կիսամյակում Հայաստանից մեկնողների թիվը 95 հազարով գերազանցել է ժամանողների թվին: Միջազգային ուղևորահոսքերի բացասական մնացորդը նախորդ տարվա առաջին կիսամյակի համեմատ ավելացել է 21,1 հազարով կամ 28,6 %-ով: Այս մասին վկայում է ՀՀ տարածքային կառավարման նախարարության Միգրացիոն պետական ծառայության այսօր հրապարակած վերլուծությունը, որը կատարվել է ՀՀ ազգային վիճակագրական ծառայության միջազգային սահմանահատումների վերաբերյալ հրապարակած տվյալների հիման վրա: Ընդ որում՝ երկրորդ եռամսյակում միջազգային ուղևորահոսքերի բացասական մնացորդը կազմել է 57,9 հազար մարդ՝ նախորդ տարվա երկրորդ եռամսյակի 45,8 հազարի դիմաց: 2013թ.-ի առաջին կիսամյակում ուղևորահոսքերի ընդհանուր ծավալը նախորդ տարվա նույն ժամանակահատվածի համեմատ ավելացել է 220,8 հազար մարդով կամ 12,8%-ով և կազմել 1 մլն 939 հազար մարդ: Օդային տրանսպորտով սահմանը հատած ուղևորների տեսակարար կշիռը ուղևորահոսքերի ընդհանուր ծավալում կազմել է 38,2%՝ նախորդ տարվա նույն ժամանակահատվածի 45,4%-ի դիմաց: Հայաստանից առաջին կիսամյակում առավել շատ մեկնել և ժամանել են ավտոմոբիլային տրանսպորտով՝ համապատասխանաբար 617 հազար 411 մարդ և 563 հազար 931 մարդ: Բացասական սալդոն՝ 53 հազար 480: Օդային տրանսպորտով Հայաստանից մեկնել է 390 հազար 996 մարդ, ժամանել՝ 350 հազար 342 մարդ: Բացասական սալդոն՝ 40 հազար 654 մարդ: Երկաթուղային տրանսպորտով Հայաստանից մեկնել է 8 հազար 574 մարդ, ժամանել՝ 7 հազար 696 մարդ: Բացասական սալդոն՝ 878 մարդ: - See more at: http://pastinfo.am/hy/node/20477#sthash.2E4bbGlV.dpuf

Հայտնում է pastinfo.am-ը Բոլորը