Ուկրաինայում բողոքի ալիք են բարձրացրել ադրբեջանցիները՝ կապված Հայոց ցեղասպանության ճանաչման բանաձևի նախագծի հետ

Ուկրաինայի ադրբեջանցիները, որոնք հավաքվել էին երկրի խորհրդարանի շենքի առջև, իրենց բողոքն են ուղղել խոսնակին՝ կապված Հայոց ցեղասպանության ճանաչման մասին բանաձևի նախագծի հետ:

Հայտարարությունը, որը ստորագրել էին Ուկրաինայի ադրբեջանցիների կոնգրեսը, «Ուկրաինայի ադրբեջանցի երիտասարդներ» միությունը և Ուկրաինայում Ադրբեջանի Աքսակալների խորհրդի ներկայացուցչությունը, ուղարկվել է նաև Ուկրաինայի նախագահ Վիկտոր Յանուկովիչին: Այս մասին Trend գործակալությանը հայտնել է Ուկրաինայի ադրբեջանցիների կոնգրեսի ներկայացուցիչ Ռովշան Թագիևը:

Հայտարարության մեջ բողոք է արտահայտվում Հայոց ցեղասպանության մասին բանաձևի նախագծի քննարկման նախապատրաստությունների առնչությամբ: Դրանում ասվում է, որ Ուկրաինան բազմազգ պետություն է, որտեղ բնակվում են ավելի քան 130 էթնիկ խմբեր, և նման օրինագծերը պահանջում են հավասարակշռված մոտեցում:

«Խորհրդարանում նախագծի ընդունումը լուրջ հարված կհասցնի թյուրքալեզու երկրների, այդ թվում՝ Ադրբեջանի և Թուրքիայի հետ Ուկրաինայի հարաբերություններին ու կապերին»,- ասվում է հաղորդագրության մեջ:

Հայտարարության մեջ հնչեցվում է խնդրանք և կոչ՝ ուղղված Գերագույն ռադային, ինչպես նաև Ուկրաինայի նախագահին՝ կասեցնելու այդ նախագծի քննարկման նախապատրաստությունը:

Որոշվել է նախագծի քննարկման օրը Կիևում թյուրքալեզու ժողովուրդների ներկայացուցիչների կողմից զանգվածային բողոքի ակցիա սկսել Գերագույն ռադայում:

Հայտնում է 1in.am-ը Բոլորը