ՆԱԽ ՓՈՐՁԵՑԻՆ ՇՆԵՐԻ ՎՐԱ, ՀԵՏՈ ԱՆՑԱՆ ՀԱՅԵՐԻՆ...

Feb. 24th, 2012 at 3:26 PM

Թուրքական «Սաբահ» պարբերականում Սուլեյման Յաշարը մի հոդված է հրապարակել, որում նա մեջբերում է 1993 թվականին լույս տեսած պրոֆ. Իսմեթ Սունգուրբեյի «Կենդանիների իրավունքները` մարդկության մասին մի գիրք» աշխատությունից հատվածներ:
Մասնավորապես, վերոհիշյալ գրքում տեղ գտած մի հատվածում նշվում է, թե Հայոց ցեղասպանությունը կազմակերպած «Իթիհաթ վե թերաքի» («Միասնություն և առաջադիմություն») կուսակցության առաջին զանգվածային սպանդը որն է եղել:

«Շները Ստամբուլ տեղափոխվեցին թուրքական բանակի հետ դեռ 1453 թվականին: Մի քանի հարյուրամյակ նրանք ապրում էին քաղաքում, առանց որևէ խնդրի: Սակայն «Թերաքիի» իշխանության գալուց հետո սկսվեց շների զանգվածային սպանդը: Ստամբուլում ոչնչացվեցին գրեթե բոլոր շները: Շներին սպանդից թաքցնող մարդկանց նույնպես պատժում էին»,-նշվում է գրքում:

«Սրան հետևեց Առաջին աշխարհամարտի սկիզբը, որի ընթացքում սկսվեց հայերի ջարդերն ու բռնագաղթը: Ահա այսպիսին են «Իթթիհաթ վե Թերաքիի» կողմից կենդանիների և մարդկանց կոտորածների ժամանակագրությունը»,-կարդում ենք հոդվածում:

Նշեմ, որ աշխարհռչակ դերասան, ռեժիսոր Սերժ Ավեդիքյանը 2010 թվականին այս մասին անիմացիոն ֆիլմ է նկարահանել, որը կոչվում է «Շների կղզին»: Մամուլը ֆիլմը համարել է Հայոց ցեղասպանության մետաֆոր: