ԹՈՐԳՈՄ

Գործունեությունը` Պետական գործիչ

Բնակավայրը` Հայաստան

Ըստ Աստվածաշնչի՝ Հայոց երկրի (հավանաբար Փոքր Հայքի) անվանադիր:

Հին կտակարանի ազգացանկում համարվում է Գամիրքի անվանադիր Գամերի որդին, սակերի նախնի Ասքանազի և պափլագոնացիների նախնի Ռիփաթի եղբայրը:

Մովսես Խորենացու մոտ պահպանված ազգացանկում ԹՈՐԳՈՄը համարվում է Գամերի թոռը և Հայոց անվանադիր նախնի Հայկի հայրը:

Ըստ Աստվածաշնչի՝ «Թոգարմա տունը», այսինքն՝ ԹՈՐԳՈՄի երկիրը, Տյուրոս քաղաքի վաճառանոցներն էր տանում ձիեր ու ջորիներ (Մարգարեություն Եզեկիելի, Իէ, 14):

Աստվածաշնչի հին մեկնիչները «տուն Թորգոմայ» կամ «Թորգոմական աշխարհ» ասելով հասկացել են գլխավորապես Հայաստանը:

Որոշ ուսումնասիրողներ «Թորգոմի տունը» նույնացնում են խեթական արձանագրությունների Թեգարամա կամ Թագարամա և ասորեստանյան արձանագրությունների Թիլ- Գարիմմու երկրանուններին: