ԴԱՎԻԹ ԱԼԱՎԿԱ ՈՐԴԻ

Գործունեությունը` Իրավաբան, Կրթական գործիչ

Բնակավայրը` Հայաստան

Իրավագետ, եկեղեցական գործիչ, վարդապետ:

Ծննդյան թիվն անհայտ է, Գանձակ:
Մահ. 1130թ.:

Հիշատակում են Կիրակոս Գանձակեցին (անվանել է «սուրբ լուսավորիչ Դավիթ վարդապետ»), Վարդան Արևելցին (համարել է Հովհաննես Սարկավագի «լծակիցը»), Մխիթար Այրի վանեցին և այլք:

ԴԱՎԻԹ ԱԼԱՎԿԱ ՈՐԴուց մեզ են հասել 98 խրատական կանոններ՝ «Կանոնական օրինադրութիւն» խորագրով, որոնք հայտնի են 17 ընդօրինակություններով (15-ը՝ Մատենադարանում, մեկական՝ Վենետիկի Ս. Ղազարի և Վիեննայի մատենադարաններում), առաջին անգամ լույս է տեսել «Էջմիածին» ամսագրում (1952, № 9-12, 1953, № 1-3)՝ Ա. Աբրահամյանի աշխատասիրությամբ:

1961-ին Բելգիայում անգլերեն թարգմանությամբ հրատարակել է անգլիացի հայագետ Չ. Դաուսեթը:
Երկն ունեցել է գործնական նշանակություն, հետապնդել մշակութալուսավորչական նպատակներ, բովանդակել խորհուրդներ կենցաղային, սեռ. մաքրակեցության ու կյանքի, ծննդաբերության մասին և ակլն:

Մի շարք կանոններում խոսվում է պատժի ենթակա զանազան մեղքերի ու հանցանքների մասին:
Կանոնների մի խումբ ուղղակի հրահանգներ են բարեպաշտական ծեսերի, տոների, ժամերգության, պահքի, մկրտության և այլնի վերաբերյալ:

ԴԱՎԻԹ ԱԼԱՎԿԱ ՈՐԴԻն արժեքավոր տեղեկություններ է հաղորդում ժամանակի բարքերի, կենցաղի, ժողովրդի բարոյական վիճակի և կյանքի մասին:

Մխիթար Գոշն իր Դատաստանագիրքը կազմելիս օգտվել է «Կանոնական օրինադրութիւն»-ից:

Գրակ.
Կոստանյան Կ., Դավիթ վարդապետ Ալավկա Որդի, ԱՀ, գիրք 14, 15, Թ., 1906, 1907: