Ուժեղ Ադրբեջանը թույլ Հայաստանի հետ կարող է խոսել ցանկացած լեզվով՝ հայտարարել է Իլհամ Ալիևը

«Ուժեղ Ադրբեջանը թույլ Հայաստանի հետ կարող է խոսել ցանկացած լեզվով»,-այսօր, Ադրբեջանի Զինված ուժերի օրվան նվիրված զորահանդեսի ժամանակ իր ելույթում ասել է Ադրբեջանի նախագահ Իլհամ Ալիևը:

Ինչպես հաղորդում է ադրբեջանական APA գործակալությունը, Ալիևը հավելել է, թե իրենք ի վիճակի են ղարաբաղյան հարցը լուծել նաև ռազմական ճանապարհով, սակայն տարածաշրջանում կայունություն ապահովելու համար առայժմ նախընտրում են բանակցությունների ուղին:

«Ադրբեջանը մեծ հեղինակություն ունի տարածաշրջանում և կայունացնող դեր է կատարում: Առանց Ադրբեջանի համաձայնության տարածաշրջանում չի կարող որևէ նախագիծ, որևէ նախաձեռութուն կյանքի կոչվել: Այդ պատճառով էլ տարածաշրջանում կայունություն ապահովելու համար մենք առայժմ ընտրում ենք խնդրի լուծման քաղաքական ուղին: Սակայն գաղտնիք չէ, որ Ադրբեջանը օրեցօր դառնում է ավելի ուժեղ, իսկ Հայաստանը՝ավելի թույլ: Մենք ցանկացած տեսանկյունից մի քանի անգամ գերազանցում ենք մեր թշնամիներին, որոշ ուղղություններով՝ նույնիսկ ավելի քան 10 անգամ և այդ տարբերությունը ժամանակի ընթացքում մեծանալու է: Քանի որ մենք ակնհայտորեն ապագա ունենք, հեռանկարներ, զարգացման ուղին»:

Ղարաբաղյան հակամարտությունը սկսվել է 1988 թ-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում (պատմական Հայաստանի անբաժան մասն էր) տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը, կողմ քվեարկեց Ադրբեջանից ամբողջովին անկախանալու օգտին։ Դրանից հետո սկսվեցին լայնածավալ ռազմական գործողություններ, որոնց հետևանքով Ադրբեջանը կորցրեց վերահսկողությունը (1921 թ-ին հուլիսի 5-ի ՌԿ(բ)Կ կենտկոմի Կովկասյան բյուրոյի որոշմամբ Լեռնային Ղարաբաղը ներառվեց Ադրբեջանի կազմի մեջ) Լեռնային Ղարաբաղի և դրան հարակից յոթ շրջանների նկատմամբ։

1994 թ-ի մայիսի 12-ին ուժի մեջ մտավ զինադադարի մասին համաձայնագիրը. հակամարտության գոտում ավարտվեցին ռազմական գործողությունները։ Զինադադարի ռեժիմի մասին համաձայնագիրը պահպանվում է մինչև այժմ։

1992 թ-ից հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում( համանախագահող երկրները՝ ԱՄՆ, Ֆրանսիա, Ռուսաստան) բանակցություններ են ընթանում:


+Հայտնում է Թերթ.am-ը Բոլորը