Արցախում հնարավոր պատերազմի դեպքում Վրաստանը կօգնի Ադրբեջանին, ընդ որում՝ բացեիբաց. Կոմանդոս

Արցախյան ազատամարտի հերոս, ՀՀ ՊՆ նախկին փոխնախարար Արկադի Տեր-Թադևոսյանը (Կոմանդոսը) այն կարծիքին է, որ Արցախում հնարավոր պատերազմի դեպքում հարևան Վրաստանը կօգնի Ադրբեջանին, ըստ որում`բացեիբաց: Նման կարծիք նա հայտնեց այսօր՝ լրագրողների հետ հանդիպման ժամանակ՝ հղում անելով վրացական փորձագիտական շրջանակներին:

«Այն, որ Վրաստանը ավելի շատ և նավթային հետաքրքրություններ ունի Ադրբեջանի ու Թուրքիայի հետ, ձեզ հայտնի է»,-ասաց բանախոսը:

Ըստ Տեր-Թադևոսյանի՝ «Հավաքական անվտանգության պայմանագիր կազմակերպությունում»` ՀԱՊԿ-ում ներառված պետությունները տարբեր հետաքրքրություններ ունեն և միանշանակ չէ, որ Հայաստանի ու Լեռնային Ղարաբաղի համար դժվար պահին այդ պետությունները մեզ կօգնեն:

«Ղրղըզստանի նախագահը, գիտեք, ինչ ջերմ վերաբերմունք ունի Իլհամ Ալիևի նկատմամբ: Այնպես որ, ես կխոսեմ այն պետությունների մասին, որոնք միանշանակ կօգնեն մեզ դժվար պահին: Դրանք առաջին հերթին Ռուսաստանն ու Բելառուսն են»,- ասաց պաշտոնաթող բարձրաստիճան զինվորականը` հավելելով, որ միանշանակ չի համարում նաև կազմակերպության անդամ, Ադրբեջանի հետ նավթային խնդիրներ ունեցող Ղազախստանի դիրքորշումը հնարավոր վտանգի դեպքում:

«Բայց սա էլ առիթ չէ, որպեսզի մտածենք, որ Ղազախստանն իր ողջ ուժերը կհանի Ադրբեջանի դեմ»,- ասաց Արկադի Տեր-Թադևոսյանը:

Ինչ վերաբերում է Լեռնային Ղարաբաղի պաշտպանությանը ՀԱՊԿ մասնակցությանը՝ հնարավոր վտանգի դեպքում, ապա ըստ Կոմանդոսի` ՀԱՊԿ-ում ԼՂՀ-ի վերաբերյալ որևէ պայմանավորվածություններ չկան:

Եվ ՀԱՊԿ պայմանագրում հստակ նշված է, որ անդամ-կազմակերպությունները պետք է պաշտպանեն միայն Հայաստանի Հանրապետության սահմանները:

Լուրեր Հայաստանից - Թերթ.am